Antolojiye Şiirane Kırmancki

Edebîyatê kirmanckî êdî reşto yew sewîyêka başe û ma eşkenîme nê edebîyatî ser o teorî, rexne û açarnayîşan bikerîme. Helbet no seba antolojîyan zî wina yo. Ma beno ke ewro seba kirmanckî besenêkenîme şîîran goreyê babetan tasnîf bikerîme û antolojîyanê cîyayan amade bikerîme labelê ma besekenîme goreyê deman yew antolojê şîîran amade bikerîme. Antolojî seba heme ziwan û edebîyatan ê dinya cayêko zaf girîng gênê. Manaya antolojî “guldeste” yo. Xebatê ke parçeyanê weçiniteyanê esaranê edebîyan ra êna pêser ra êno vatene. Antolojî bi metodanê cîya-cîyayan êno amadekerdene. Antolojî seba yew edebîyatî vîr (hafiza) o, lîlika/neynika yew ziwanî yo, maceraya ma ya poetîke bi xo ya. Feydayanê antolojîyanê şîîran ê tewr muhîman ra yew no yo: Antolojî musnenê ma ke heta nê dewrî şîîre senî qonaxanê vurîyayîşî ra derbaz bîya û ameya reşta sewîyeya senêne, se bîya û şeklo senên girewto. Ez bawer kena no antolojî zî na rewşe edebîyatê ma de zelal musaneno wendoxanê kirmanckî.